محامي: محدش يقدر يقبض على مرتضى منصور
قال المستشار أحمد مهران مدير مركز القاهرة للدراسات السياسية والقانونية والمحامي بالنقض إن لسان حال مرتضى منصور بعد الحكم النهائي بحبسه شهر في قضية سب رئيس النادي الأهلي محمود الخطيب هي طظ في القانون والدستور.
وأضاف “مهران” في فيديو نشره على صفحته الشخصية بموقع التواصل الاجتماعى "فيس بوك": “مرتضى” خرج يرد على حكم المحكمة الاقتصادية محكمة جنح مستأنف التي قضت اليوم بحبسه شهر حكم نهائي واجب النفاذ، وهو بيلعب بينج بونج.. ايه اه.. وبيقول انا مش فاضيلكوا طب لما افضي ابقى أجيلكم.
وتابع: “احنا كشعب ملناش مصلحة في أننا نقبض عليك والنادي الأهلي مش سلطته تنفيذ أحكام يبقى فاضل مين الدولة والقضاء؟.. متسائلًا: “هما دول اللي لما تفضى هتجيلهم؟.
وتابع "مهران": “نتمني ان يكون في رد من الدولة ورد من القضاء وده حكم نهائي واجب النفاذ المفروض ان لما مواطن بيصدر ضده حكم نهائي واجب النفاذ إما أن يتم توقيفه في كمين أو يقبض عليه”.
وتوقع "مهران" ألا يتم القبض على منصور قائلًا: ”محدش هيوقف مرتضى ومحدش هيقوله رايح فين”.
واختتم:، ”بتوع التنفيذ عندهم أحكام كثيرة أوي مش ده الحكم اللي واقفين عليه، مرتضى منصور عارف انه محدش هينفذ الحكم محدش هينفذ عليه ولا حد هيبقبض عليه عشان ينفذ حكم نهائي واجب النفاذ ماهو شايف نفسه فوق القانون، مرتضى منصور بيقول لكل مواطن لما يصدر ضده حكم نهائي واجب النفاذ اطلع اعمل بيان إعلامي يرد على الدولة ويقولهم انا بلعب بينج بونج انا مش فاضلكم لما افضى هبقى اجيلكم".